Mae hwn yn gyfnod cyffrous i Borthcawl, gyda’r dref wedi’i chlustnodi ar gyfer cyllid ac adfywio sylweddol. Er mwyn sicrhau’r buddion hirdymor mwyaf posibl i drigolion ac ymwelwyr, mae Cyngor Bwrdeistref Sirol Pen-y-bont ar Ogwr a Llywodraeth Cymru wedi llunio cytundeb tirfeddiannwr i weld cynnydd y Glannau fel un datblygiad cytûn, ac yn cydweithio ar Uwchgynllun cynhwysfawr ar gyfer y Glannau.
Mae cynigion yr Uwchgynllun wedi’u llunio gan ymgysylltu cymunedol blaenorol, gan gynnwys y Strategaeth Creu Lleoedd a’r ymgynghoriadau Dylunio Cysyniad Mannau Agored, gan sicrhau eu bod yn adlewyrchu anghenion y gymuned leol gan hefyd adeiladu ar batrwn hanysyddol y tref.
Yn dilyn ymgynghoriad cynharach ym mis Chwefror 2025, aeth gwaith ymlaen i ddiwygio a diweddaru’r uwchgynllun mewn modd a oedd yn ymateb i’r ymatebion i’r ymgynghoriad, ochr yn ochr â chwblhau gwaith technegol pellach. I grynhoi, mae’r meysydd allweddol lle gwnaed gwelliannau yn dilyn ymgynghoriad Chwefror 2025 yn ymwneud â’r canlynol:
• Pwll nofio Lido a gampfa ymhlith ychwanegiadau newydd i gynlluniau adfywio
• Ffair hwyl newydd i greu tirnodau glan y môr eiconig a dathlu treftadaeth Porthcawl
• Uchder adeiladau wedi’i leihau a llai o gartrefi wedi’u cynllunio ar draws yr ardal adfywio
• Golwg ffres ar lan y môr yn cynnwys lle ar gyfer gwesty a phromenâd newydd ar gyfer Traeth Coney / Bae Sandy
• 45 y cant yn fwy o le agored cyhoeddus, cyfleusterau cymunedol a llwybrau ar gyfer cerdded a beicio
• Pobl leol yn cael blaenoriaeth ar gyfer tai, ymrwymiad i gyfyngiadau ar osodiadau gwyliau / ail gartrefi
Roedd y cynigion diwygiedig yn destun ymgynghoriad pellach o fis Tachwedd 2025 i fis Ionawr 2026 fel rhan o’r Broses Ymgynghori Cyn Gwneud Cais statudol. Mewn ymateb i’r adborth pellach ar y cam hwn, gwnaed y newidiadau ychwanegol canlynol fel rhan o gynigion cam y Cais Cynllunio Amlinellol:
• Mae’r ddarpariaeth parcio cyhoeddus wedi cynyddu’n sylweddol, gyda hyd at 150 o leoedd ychwanegol ar draws y safle, gan ddod â’r cyfanswm i 750 o leoedd. Mae parcio bellach wedi’i ganoli mewn clystyrau cliriach a mwy mewn lleoliadau hygyrch iawn
• Tynnu’r bloc preswyl o Erddi Bae Coney. Mae’r newid yn ymateb yn uniongyrchol i bryderon ynghylch parcio ar y traeth ac ar lan y môr yn ystod cyfnodau brig
• Mae cael gwared ar ddatblygiad o Barc Traeth Coney hefyd yn creu mwy o hyblygrwydd ar gyfer cyflawni cynnar, gan ganiatáu i barcio, y parc, a seilwaith mynediad cysylltiedig ddod ymlaen fel cyfnod cynnar
• Mae toiledau cyhoeddus wedi’u hychwanegu wrth ymyl Parc Traeth Coney a phrif faes parcio, wedi’u graddio’n briodol ar gyfer niferoedd ymwelwyr brig ac wedi’u hintegreiddio i adeilad ciosg mwy i wella gwelededd a defnyddioldeb
